Ármann Reynisson les upp úr Vinjettum VI í Grindavík.
Ljósmynd: Þorsteinn Kristjánsson.
Æviágrip
Ármann Reynisson fæddist árið 1951 í Reykjavík. Hann hefur tekið virkan þátt í menningar- og viðskiptalífi á Íslandi allt frá því hann sneri heim frá Englandi árið 1982 að loknu námi við The London School of Economics. Höfundurinn hefur ekki farið hefðbundnar leiðir í lífinu heldur lagt áherslu á það að skapa eitthvað nýtt og áhugavert í þeim störfum sem hann hefur tekið sér fyrir hendur og fyrir það þótt litríkur persónuleiki í heimalandi sínu.
Fyrstu árin eftir nám sitt var hann einn af áhrifamestu brautryðjendum á íslenska fjármálamarkaðinum sem þá var áratugum á eftir mörkuðum í öðrum vestrænum ríkjum. Á tímabili samanstóð viðskiptaveldi Ármanns af fjölda fyrirtækja á ólíkum sviðum atvinnulífsins. Hann var auk þess öflugur stuðningsmaður menningar og lista, listaverkasafnari og úthlutaði úr tónlistarsjóði sínum til ungs tónlistarfólks. Þá var ævintýraljómi yfir veislum Ármanns hvað varðar glæsileika og áhugaverða gesti hvaðanæva úr þjóðlífinu. Viðskipti Ármanns Reynissonar og heimili var lagt í rúst á einni nóttu af opinberum aðilum sem áttu á þeim tíma erfitt með að skilja nútímaviðskipti og starfsemi frumkvöðla. Eftir stóð Ármann á sviðinni jörð, nánast sviptur mannlegum réttindum, auk þess var hann dreginn í gegnum réttarkerfi landsins í fimm ár að viðbættri eins árs fangelsisvist. Síðar kom í ljós að Ármann var dæmdur fyrir viðskipti sem þóttu hin eðlilegustu þegar fram liðu stundir. Þetta sex ára tímabil olli straumhvörfum í lífi Ármanns Reynissonar. Í staðinn fyrir að gefast upp þegar öll spjót stóðu á honum þá réri hann lífróður og byggði upp ný viðskipti sem hann hefur stundað allar götur síðan heiman frá sér. Hann sneri baki við hinu ljúfa lífi og í staðinn tók við íhugun, líkamsrækt og náttúruskoðun. Þungbær lífsreynsla og innri barátta varð til þess að Ármann tók að skyggnast dýpra í mannlífið og tilveruna en ekki eingöngu virða fyrir sér það yfirborð sem fólk horfir oftast nær á.
Það var í ágúst árið 2000 að þörfin til þess að tjá sig í sögum losnaði úr læðingi. Þá settist Ármann niður og skrifaði fyrstu vinjettuna og þar með brast stíflan, fimm bækur hafa komið út á fimm árum. Það uppgötvaðist eftir að Ármann sendi frá sér fyrstu vinjettubókina að þar með kynnti hann nýja bókmenntagrein inn í 1000 ára sögu íslenskra bókmennta.
Höfundarréttur © 2001 Ármann Reynisson